17 medaljar og mange persar på KM i Molde

Ørsta IL friidrett stilte med sju motiverte utøvarar på krinsmeisterskap i friidrett Molde 13.-14. august. Det var godt over 100 deltakarar frå heile fylket på stemnet. Det vart sju gull, fem sølv, fem bronse og åtte personlege rekordar for Ørsta-gjengen.

Dette var det første stemnet etter sommarferien for mange av utøvarane, og dei fleste var spente på resultata. Ei slik god opning på haustsesongen var nok betre enn mange hadde vona.

Elias Hovden Nilsen (G15) deltok i seks øvingar på KM og gjorde det godt i alt. Han har trent godt i sommar og tok tre gull og ein bronse. Elias er i landstoppen i si aldersklasse i spyd og vann som venta i den øvinga. Lengstekastet hans var 49,00 meter. I kule støytte han 10,96 meter og vann der. Han vann og i høgde med ny pers på 1,56 meter.

Marie Steinnes (J12) er både rask og har god spenst. Ho tok sølv og sette ny pers på med 9,04 sekund på 60 m. Ho tok og sølv på 60 meter hekk med 11,72 sek, og hoppa til sølv i lengde med 4,23 m. Ho tok bronse og sette ny pers på 200 meter med tida 31,02 sek.

Andrine Hjellen Haugland kasta 500 grams-spydet ut til 40,20 m og tok heim gullet klassen J17. Andrine er i svært god form, og tok ein god 4. plass i spyd førre helg i junior-NM.

Thea Nilsen (J11) tok medaljar i tre av fire øvingar ho var med i.

Anna Hjellen Haugland (J14) tok gull i både spyd og kule.

Åse Øyehaug (J15) tok sølv i lengde og bronse på 80 meter hekk.

Sigrid Vartdal (J15) tok gull i 200 meter med 27,44 (926 Tyrving-poeng).

Krinsmeisterskapen i Molde vart arrangert som ein dugnad der klubbane i krinsen stilte med funksjonærar. Laurdagen var det regn heile dagen, og resultata bar preg av det. Søndagen var det godt ver. Det er god aktivitet og godt nivå i mange klubbar i fylket.

Resultatliste finn du her: https://www.friidrett.no/globalassets/kretser/more-og-romsdal/dokumenter-2016/km-molde/resultatliste---komplett.pdf

Ørsta IL friidrett på KM i Molde: Frå venstre Marie Steinnes, Andrine Hjellen Haugland, Sigrid Vartdal, Elias Hovden Nilsen, Åse Øyehaug, Anna Hjellen Haugland og Thea Nilsen.